ஒட்டுமொத்தமாக கிரிக்கெட்டுக்கு குட்பை சொன்ன கம்பீர்

இந்தியக் கிரிக்கெட் அணி இரண்டு முறை உலகக் கோப்பை வெல்ல முக்கிய காரணமாக இருந்தவர் கௌதம் கம்பீர். கடந்த ஆண்டு ஐபிஎல் போட்டிகளில் மோசமாக விளையாடிய அவர் அதற்குப் பின் வேறு எந்த போட்டிகளிலும் விளையாடாமல் இருந்தார்.

ஐபிஎல் தொடரில் கடந்த ஆண்டு அவர் அங்கம் வகித்த டெல்லி அணியும் அவரை கழற்றிவிட்டுவிட்டதால், ஆஸ்திரேலியாவில் நடைபெறும் இந்திய அணியின் போட்டிகளில் வர்ணனையாளராக புதிய அவதாரம் எடுத்துள்ளார்.

இந்நிலையில், இனி மீண்டும் எந்த அணியிலும் இடம்பிடிக்க வாய்ப்பில்லை என்று புரிந்துகொண்ட அவர், அனைத்து விதமான கிரிக்கெட் போட்டிகளில் இருந்தும் ஓய்வு பெறுவதாக அறிவித்துள்ளார்.

ட்விட்டரில் தனது அறிவிப்பை பதிவிட்ட அவர், “எல்லா கடினமானா முடிவுகளுமே கனத்த இதயத்துடன்தான் எடுக்கப்படுகின்றன. நானும் ஒரு கனத்த இதயத்துடன் ஒரு முடிவை அறிவிக்கிறேன்.” என்று குறிப்பிட்டுள்ளார்.

58 டெஸ்ட், 147 ஒருநாள் மற்றும் 37 டி20 போட்டிகளில் விளையாடியுள்ள அவர் முறையே 4154, 5238 மற்றும் 932 ரன்கள் எடுத்தார். ஐபிஎல் போட்டிகளில் கொல்கத்தா அணியை வெற்றிகரமாக வழிநடத்தி இரு முறை கோப்பையை பெற்றுக்கொடுத்தார்.

2007ஆம் ஆண்டு டி20 உலகக் கோப்பை வென்ற இந்திய அணியிலும் 2011ஆம் ஆண்டு ஒருநாள் உலகக் கோப்பை வென்ற இந்திய அணியிலும் கம்பீர் முக்கிய பங்காற்றினார். இந்த இரண்டு தொடர்களிலும் இறுதிப்போட்டியில் அதிக ரன்குவித்து வெற்றிக்கு வித்திட்டவர் கம்பீர் என்பதை எந்த இந்திய கிரிக்கெட் ரசிகராலும் மறக்க முடியாது.

Leave a Reply

Your email address will not be published. Required fields are marked *